प्रेम जगातली सुंदर भावना. ती शब्दात व्यक्त करणं अवघडच.! प्रेमाच्या सुखद परीस्पर्शाची जाणीव करून देत ते निभावण्याच्या सामर्थ्याची गोष्ट सांगणारा अर्जुन यशवंतराव गुजर दिग्दर्शित लगन हा चित्रपट प्रेक्षकांच्या भेटीला आला आहे. जी.बी.एंटरटेंन्मेंट निर्मित हा चित्रपट येत्या शुक्रवारी ६ मे ला चित्रपटगृहांत दाखल होत आहे. लगन चित्रपटातून अज्या आणि नांदिनीची प्रेमकहाणी प्रेक्षकांना पहायला मिळणार आहे. सुजित चैारे आणि श्वेता काळे ही नवी युवा जोडी या चित्रपटातून प्रेक्षकांच्या समोर येणार आहे. या जोडीसोबत स्मिता तांबे, प्रशांत तपस्वी, शुभम शिंदे,अपेक्षा चलवादे, अनिल नगरकर, रामचंद्र धुमाळ आदि कलाकारांच्या या चित्रपटात भूमिका आहेत.
चित्रपटाला साजेशी दणक दणक, सरलं, पायी फुफाटी, दचकतंय ही चारही गाणी चांगली जमून आली असून सध्या सर्वाधिक व्ह्युज मिळवत ही गाणी गाजतायेत. ‘सरलं सार अंधार सरलं पुनवेचा चांद उगल तुझ्याच येण्यान र’…. हे बहारदार प्रेमगीत प्रत्येकाच्या ओठावर आहे तर ‘हलगीपुढं DJ नं नाद करायचा नाय’ या गाण्याने तर प्रत्येकाला वेड लावलं असून त्याच्या ठेक्यावर संपूर्ण महाराष्ट्र नाचतोय. अजय गोगावले यांच्या आवजातील ‘पायी फुफाटा रुतला काटा’ हे गाणं ही प्रेक्षकांच्या मनाचा ठाव घेण्यात यशस्वी झालं आहे. अजय गोगावले, आदर्श शिंदे, चिन्मयी श्रीपाद, ओमकारस्वरूप बागडे, पी.शंकरम यांचा स्वरसाज चित्रपटातील गाण्यांना लाभला आहे. संगीत पी.शंकरम, विजय गवंडे, रोहित नागभिडे यांचे आहे.
प्रेम आणि नात्यातील भावभावनांचा प्रवास दाखवताना ‘प्रेम निभावता आलं तर ते जिंकतं’ हे सांगण्याचा प्रयत्न ‘लगन.. तुमाला वाटतंय पण सोपं नायी’ या चित्रपटातून करण्यात आला आहे. प्रेमाला प्रेमानेच जिंकता येऊ शकतं हा विचार घेऊन हा चित्रपट केल्याचे दिग्दर्शक अर्जुन गुजर सांगतात. ही फ्रेश जोडी आणि चित्रपटाचं संगीत प्रेक्षकांना आवडेल असा विश्वास ही ते व्यक्त करतात.
‘लगन’चे लेखन आणि दिग्दर्शन अर्जुन यशवंतराव गुजर यांनी केलं आहे. चित्रपटाचे निर्माते सय्यद मुस्तफा, भारत गुजर, रत्नमाला पवळ, मोहिनी गुजर, गहिनाथ गुजर आहेत तर चित्रपटाचे सहनिर्माते बिभीषण पवार, बळे साहेब, कैलास गुजर, किशोर काकडे,नितीन भारती, सपकाळ फोजी, शाहजी डोके, सोमिनाथ डोके, मुन्ना शेख, विठ्ठल पाटोळे,बिभीषण गुजर, विष्णू गुजर, नामदेव गुजर, अंगद गुजर, गणेश गुजर आहेत. छायांकन सोपान पुरंदरे आणि रणजीत माने यांचे आहे. पार्श्वसंगीत पी.शंकरम तर साऊंड डिझायन विकास खंदारे यांचे आहे.
६ मे ला लगन चित्रपटगृहात दाखल होत आहे.
