औरंगाबाद, दिनांक 16 : प्रधानमंत्री कुसूम योजनेंतर्गत सौर पंपासाठी अर्ज करणाऱ्या अनेक शेतकऱ्यांच्या भ्रमणध्वनीवर फसवे संदेश पाठवले जात आहेत. यातून शेतकऱ्यांची फसवणूक होण्याची शक्यता आहे. या संदेशापासून सावध रहा, असे आवाहन महाऊर्जाचे विभागीय महाव्यवस्थापक विकास रोडे यांनी केले आहे.
महाऊर्जा विभागीय कार्यालयांतर्गत येणाऱ्या औरंगाबाद, जालना, हिंगोली व परभणी जिल्ह्यातील अनेक शेतकऱ्यांनी या फसव्या संदेशांबद्दल सायबर सेलमध्ये तक्रारी केल्या आहेत. त्यात काही बनावट संकेतस्थळ, मोबाईल ॲप तसेच दूरध्वनी आणि भ्रमणध्वनीद्वारे या योजनेच्या नावाखाली सौरपंप मिळण्यासाठी अर्ज करण्यास व नोंदणी शुल्क आणि सौरपंपाची किंमत ऑनलाइन भरणा करण्यास सांगितले जात आहे. अशा खोट्या, संकेतस्थळ मोबाईल ॲपला प्रतिसाद देऊ नका. तसेच फसव्या दूरध्वनी आणि भ्रमणध्वनीवरील प्रलोभनांना बळी पडू नका, अशा संकेतस्थळावर, ॲपवर ऑनलाईन पद्धतीने पैसे भरु नका, असे आवाहनही रोडे यांनी केले आहे.
प्रधानमंत्री कुसुम योजना शासनाच्या महाऊर्जा विभागामार्फत राबवण्यात येत आहे. या योजनेच्या सविस्तर माहितीसाठी व ऑनलाईन नोंदणीसाठी महाऊर्जाच्या अधिकृत संकेतस्थळावरच भेट द्यावी. अधिक माहितीसाठी महाऊर्जा विभागीय कार्यालय, सिटी सर्व्हे नं.11149, शॉप नं. 305,तिसरा मजला, साई ट्रेड सेंटर, रेल्वे स्टेशन रोड, औरंगाबाद (फोन 0240-2653595, ई-मेल :- domedaabad@mahaurja.com) येथे संपर्क साधावा, असे रोडे यांनी कळविले आहे.
